Cela lairons aus
soudaiers.' Or li preudhome entre eulx moult scevent bien com tiex
paroles sont nyaises; mes si ont paour de lour en dire la verite pour ce
que cuident desplaire as bourjois et a la menue gent.
"Or je vous di sanz faille que, quand Messires Marcs Pols sceust ces
choses, moult en ot pitie de cestui pueple, et il li vint a remembrance
ce que avenu estoit, ou tens Monseignour Nicolas et Monseignour
Mafe, a l'ore quand Alau, frere charnel dou Grant Sire Cublay, ala
en ost seur Baudas, et print le Calife et sa maistre cite, atout son
vaste tresor d'or et d'argent, et l'amere parolle que dist ledit Alau au
Calife, com l'a escripte li Maistres Rusticiens ou chief de cestui
livre.[12]
"Car sachies tout voirement que Messires Marc moult se deleitoit a
faire appert combien sont pareilles au font les condicions des diverses
regions dou monde, et soloit-il clorre son discours si disant en son
language de Venisse: 'Sto mondo xe fato tondo, com uzoit dire mes
oncles Mafes.'
"Ore vous lairons a conter de ceste matiere et retournerons a parler de
la Loy des genz de Bretaingne la Grant.
Cy devise des diverses creances de la gent Bretaingne la Grant et de
ce qu'en cuidoit Messires Marcs.
"Il est voirs que li pueples est Crestiens, mes non pour le plus selonc
la foy de l'Apostoille Rommain, ains tiennent le en mautalent assez.
Seulement il y en a aucun qui sont feoil du dit Apostoille et encore
plus forment que li nostre prudhome de Venisse. Car quand dit li
Papes: 'Telle ou telle chose est noyre,' toute ladite gent si en jure:
'Noyre est com poivre.' Et puis se dira li Papes de la dite chose: 'Elle
est blanche,' si en jurera toute ladite gent: 'Il est voirs qu'elle est
blanche; blanche est com noifs.' Et dist Messires Marc Pol: 'Nous
n'avons nullement tant de foy a Venyse, ne li prudhome de Florence
non plus, com l'en puet savoir bien apertement dou livre Monseignour
Dantes Aldiguiere, que j'ay congneu a Padoe le meisme an que
Messires Thibault de Cepoy a Venisse estoit.[13] Mes c'est
joustement ce que j'ay veu autre foiz pres le Grant Bacsi qui est com
li Papes des Ydres.'
"Encore y a une autre maniere de gent; ce sont de celz qui s'appellent
filsoufes;[14] et si il disent: 'S'il y a Diex n'en scavons nul, mes il
est voirs qu'il est une certeinne courance des choses laquex court
devers le bien.' Et fist Messires Marcs: 'Encore la creance des
Bacsi qui dysent que n'y a ne Diex Eternel ne Juge des homes, ains il
est une certeinne chose laquex s'apelle Kerma.'[15]
"Une autre foiz avint que disoit un des filsoufes a Monseignour Marc:
'Diex n'existe mie jeusqu'ores, aincois il se fait desorendroit.' Et
fist encore Messires Marcs: 'Veez-la, une autre foiz la creance des
ydres, car dient que li seuz Diex est icil hons qui par force de ses
vertuz et de son savoir tant pourchace que d'home il se face Diex
presentement. Et li Tartar l'appelent Borcan. Tiex Diex Sagamoni
Borcan estoit, dou quel parle li livres Maistre Rusticien.'[16]
"Encore ont une autre maniere de filsoufes, et dient-il: 'Il n'est mie
ne Diex ne Kerma ne courance vers le bien, ne Providence, ne Creerres,
ne Sauvours, ne saintete ne pechies ne conscience de pechie, ne proyere
ne response a proyere, il n'est nulle riens fors que trop minime grain
ou paillettes qui ont a nom atosmes, et de tiex grains devient chose
qui vive, et chose qui vive devient une certeinne creature qui demoure
au rivaige de la Mer: et ceste creature devient poissons, et poissons
devient lezars, et lezars devient blayriaus, et blayriaus devient
gat-maimons, et gat-maimons devient hons sauvaiges qui menjue char
d'homes, et hons sauvaiges devient hons crestien.'
"Et dist Messires Marc: 'Encore une foiz, biaus sires, li Bacsi de
Tebet et de Kescemir et li prestre de Seilan, qui si dient que
l'arme vivant doie trespasser par tous cez changes de vestemens; si com
se treuve escript ou livre Maistre Rusticien que Sagamoni Borcan
mourut iiij vint et iiij foiz et tousjourz resuscita, et a chascune foiz
d'une diverse maniere de beste, et a la derreniere foyz mourut hons et
devint diex, selonc ce qu'il dient.'[17] Et fist encore Messires Marc:
'A moy pert-il trop estrange chose se juesques a toutes les creances des
ydolastres deust decheoir ceste grantz et saige nation. Ainsi peuent
jouer Misire li filsoufe atout lour propre perte, mes a l'ore quand tiex
fantaisies se respanderont es joenes bacheliers et parmy la menue gent,
celz averont pour toute Loy manducemus et bibamus, cras enim moriemur;
et trop isnellement l'en raccomencera la descente de l'eschiele, et
d'home crestien deviendra hons sauvaiges, et d'home sauvaige gat-
maimons, et de gat-maimon blayriaus.' Et fist encores Messires Marc:
'Maintes contrees et provinces et ysles et citez je Marc Pol ay veues
et de maintes genz de maintes manieres ay les condicionz congneues, et
je croy bien que il est plus assez dedens l'univers que ce que li nostre
prestre n'y songent. Et puet bien estre, biaus sires, que li mondes n'a
estes crees a tous poinz com nous creiens, ains d'une sorte encore plus
merveillouse. Mes cil n'amenuise nullement nostre pensee de Diex et de
sa majeste, ains la fait greingnour. Et contree n'ay veue ou Dame Diex
ne manifeste apertement les granz euvres de sa tout-poissante saigesse;
gent n'ay congneue esquiex ne se fait sentir li fardels de pechie, et la
besoingne de Phisicien des maladies de l'arme tiex com est nostre
Seignours Ihesus Crist, Beni soyt son Non.
